楊怡同羅仲謙呢對姊弟戀，拍拖5年終於喺舊年修成正果，喺英國古堡結婚。
不過婚後兩公婆努力搵錢，唔好話造人，見過面都難，卒之搞到老婆楊怡扭計，早排喺微博大呻老公唔再浪漫。
老婆詐型，謙謙即刻識做喺微博貼夫妻合照，仲留言：「當傻瓜遇上天使！」
要o氹老婆大人，貼張相梗係未夠，其實謙謙一早有安排，噚日楊怡就喺微博貼咗條短片，片中佢風騷話飛機就起飛，到咗目的地先開估話俾大家知，自己去咗邊，臨尾仲附加佻皮單眼嘟埋嘴，又hashtag「amazing day」同「amazing trip」。
啱啱楊怡就喺IG中開估，原來佢同謙謙去咗波蘭旅行，除咗兩公婆，仲有單拖嘅袁偉豪、郭晉安同周麗淇。
不過一心想喺IG開live嘅楊怡佢哋，就不停喺片中，大嗌自己唔識開live，成班人雞手鴨腳手忙腳亂嘈喧巴閉(但明明開緊live㗎其實)，楊怡又晒命話自己老公謙謙其實都好想開㗎，但IG只係follow佢一個，唔知開嚟仲乜，不過因為謙謙唔知整咗咩setting，所以開唔到咁囉！
原來今日同時係佢哋結婚一周年！
結婚一年點慶祝？楊怡今日就喺社交網上載咗張同謙謙Sweet到爆嘅合照，相中兩人深情對望，謙謙一隻強而有力嘅臂彎攬實楊怡，真係好閃呀！阿怡留言：「Our first wedding anniversary️.Thanks for being in my life.」（我哋第一年結婚周年，感激你喺我生命裏出現。）而謙謙都好識做，冧爆咁話：「一年後的今日️，老婆！多謝你！愛你！願你一世平安快樂！」網民都祝佢哋一周年快樂要永遠幸福快樂下去咁話！
(蘋果日報 / on.cc)
