貪靚真係唔係女人專利，o依家有唔少男士非常注意自己嘅外貌，尤其係自己嘅body shape，市場上唔少健身中心應運而生。講到身形管理，喺社交網絡上有唔少男星時不時都會晒吓肌肉，請fans眼睛嘆下「冰淇淋」。
不過今日請大家食「冰淇淋」嘅唔只係男星咁簡單，而係已經71歲嘅電影製作人黃百鳴。
百鳴哥近年甚少現身幕前，以前佢每次現身，九成九都係着住西裝，非常之咁formal。最估佢唔到嘅係，原來西裝之下，收埋嘅竟然係腹肌，噚日佢喺微博post咗張半裸上身出海嘅相，仲留言：「今年最後一次出海。」
重點嚟喇！半裸上身嘅百鳴唔單止一嚿豬腩肉都見唔到，仲若隱若現見到佢六嚿腹肌。
以百鳴哥71歲嘅年紀嚟講相信呢六嚿腹肌絕對係得來不易，少啲恆心同努力都做唔到，唔少網民留言畀百鳴哥讚佢有好身材o添！
(蘋果日報)
