面對種種是非、偷食、分居傳聞，今日王浩信單拖到旺角出席品牌活動時，一次過回應。
今日有報道稱王浩信私底下仍然喜愛夜蒲，經常同幾個人夫一齊行事，其中有兩人仲係「鐵腳」，號稱「三劍俠」，據知有人夫仲係電視台員工嘅另一半，而且呢啲已經係公開嘅秘密。
王浩信中午出席活動時，對於「三劍俠」傳聞，他稱：「我依家冇朋友0架喇，時間都花喺個女身上，同太太依家最重要係幫個女搵小學。我啲朋友都知道。」王浩信稱，同太太陳自瑤感情一啲問題都冇，亦都冇分居，而且鄰居可以做證。
至於有報道指同太太陳自瑤就生BB未達成共識，王浩信就稱：「其實我真係鍾意小朋友嘅，但真係唔係一件小嘅事，希望唔好為任何人帶來壓力，大家都忙緊，都唔係啱嘅時候(生BB)。」
至於同蔡思貝被爆book房鎖埋門打邊爐事件，王浩信都係形容為「真係勁無奈」，「因為《踩過界》嗰邊都係成班人約出嚟，同埋監製、成班演員一齊睇成果，係正常事，希望唔好將我哋一番心血蒙上呢啲污點。」「我同幾位(指劇中女角，包括蔡思貝等人)都係好拍檔，唔好傷害到其他人。」
咁同蔡思貝可有如爆料者所指、Book VIP房兩人共處一室閂埋門打邊爐？王浩信稱；「梗係冇啦大佬！點會咁做呀依家？冇理由咁傷害我自己，完全冇啲咁嘅事。去VIP房都係同屋企人。」問到太太陳自瑤可有為此傳聞不開心？王浩信話：「尷尬囉，都怕身邊人擔心。都明白傳媒同artist係好朋友關係。」
問王浩信點解成日都有呢啲傳聞？他稱：「我哋係少放合照，亦都少一齊出席公開活動，可能見到啲字眼就去揣測啦。我唔係一個鍾意攞屋企嘢嚟分享嗰啲人。我哋完全冇問題。」
咁陳自瑤稍後會否現身澄清？王浩信表示佢今次講完之後唔會再回應，而且太太都忙於做嘢。傳媒再問兩人關係是否全靠女兒維繫？王浩信即稱：「梗係唔係啦！目前要俾囡囡更好嘅成長同學習環境。」傳媒再問王浩信是否曾做過對唔住太太嘅事？他斬釘截鐵謂：「完全冇，唯一只係冇時間喺屋企陪佢，因為要工作。」對於有報道指兩人已分居？王浩信稱：「真係冇搬走，有錢搬走都買咗樓先啦。」又說：「今次出嚟交代真係好認真0架，希望大家俾啲空間我，唔好再搞我哋喇！」
(蘋果日報)
