藝人陳美詩（Macy）多年來默默做孫耀威（Eric）背後的女人，陪伴對方經歷過不少高低起跌，今年兩人終於修成正果結為夫婦，當然得到不少人的祝福！
講到兩人的拍拖點滴，Macy透露與Eric在朋友階段已非常有默契，之後兩人自自然然在一起，而她最被Eric打動之處，就是對方在生活鎖事上的窩心舉動：「試過一次我甩咗鞋帶，佢唔係話畀我聽，而係直接踎低幫我綁鞋帶，嗰時我哋啱啱一齊冇耐，我係好surprise嘅，同埋街上好多時好多人，佢好自自然然就會保護你，有樓梯就會翹實你，佢唔係講，而係行動上會一個臂彎咁攬住你，你就會好冧！」
她更大讚Eric會講得出做得到，亦很疼錫身邊的人：「佢事無大小都記得，就算好簡單話約食飯，佢真係會約，可能係話幫人整電話，佢講完真係轉個頭會做，會睇日曆mark期，唔會話得閒先啦，佢就真係好上心，呢啲嘢表現到佢好着緊佢身邊嘅人！」不過她坦言絕不擔心Eric的細心體貼會吸引到狂蜂浪蝶，對Eric有百分之百的信心：「愛有好多種嘅，朋友嘅愛同男女朋友嘅愛都唔一樣，好照顧朋友都唔一定需要擔心嘅，反而開心，因為依家願意表達愛嘅人唔多。」
而Macy承認不多不少會受Eric這個「行動派」所影響：「我以前好多idea諗咗，但唔知點去做，或者懶同唔敢去做，但佢好行動型，畀好多勇氣鼓勵我，依家有啲諗法，我都會識去實行。」所以一直未有放棄音樂夢的她今年亦決定再戰樂壇，推出新歌《我會照顧你》，她說：「呢幾年放慢咗腳步去充實自己，今年就好想專注番工作，又有咁嘅機會，所以係個好嘅時機去畀大家了解我。」她又指希望之後可推出更多作品，鋼琴了得的她更有意嘗試親自作曲及填詞：「我對填詞都幾有興趣，我之前有寫專欄，詞就未寫過，嚟緊都會試吓。」
(on.cc東網)
