鄭希怡（Yumiko）帶同囡囡梁子柔（梁浸浸）拍攝親子節目《不可思議的媽媽》。
在節目，梁浸浸中可能因不習慣陌生環境，加上首次跟媽咪單獨出外旅行的關係，令她情緒變得不穩。
平時乖巧的她，除特別黐身外，又不停扭計及喪喊，雖然Yumiko又呵又氹，出埋手機充電線「催眠法」氹女兒上床瞓覺，更用果汁、手機及毛公仔逗女兒收哭聲，可惜全告失敗。
Yumiko都投晒降，最後更無奈到抱住大哭的囡囡，一齊在鏡頭面前喊，相當可憐。
由於Yumiko欲用手機分散囡囡注意力，望囡囡可平復不安情緒，但有網民質疑她任由囡囡沉迷玩手機，教女不當。
Yumiko接受媒體訪問時，承認用手機氹女兒方法不對。
「平時喺香港係好少，亦唔鍾意畀佢睇電話同iPad，但為咗安撫佢，唯一呢個唔應該做都做埋，所以我都覺得自己係唔啱嘅。」
她補充其教女方法屬非主流，認為每個人都有不同方法照顧小朋友：「我覺得最緊要係方法啱自己小朋友，我想做囡囡一齊成長嘅朋友。」
至於她在節目中湊女湊到喊，Yumiko則說：「我好少喊，但嗰一刻忍不住，自責畀唔到安全感個女，搞到個女要喊住要返屋企。」
（on.cc 東網）
