今晚城城首現身，晚上8點華麗登場，一身黑西裝、狀甚風騷到尖沙嘴出席YSL活動。城城亦心情極好，同大家分享初為人父感受。佢笑笑口承認呢胎係女，形容B女就係「我嘅小公主」，且已經返家休息，更笑言呢個係「迷你版郭富城」。
B女重6磅，順產，城城謂：「BB出世嗰一刻好感動。太太好辛苦。」全家福已經影咗，「依家日日都有同BB影相留念。」城城仲話有幫手剪臍帶添。
講到剪臍帶，城城話：「嗰一刻真係好微妙，自己太太陀B十個月咁辛苦，嗰一刻好感動，全世界都轉變晒。」再問到城城有冇喊，佢笑言：「係3個一齊喊，真係好開心，唔識點形容，要做番一個爸爸嘅責任，努力工作，建立一個健康嘅家庭。」
咁試過幫BB換片片未？城城話未，餵奶都未試過，因為有陪月幫手。「而且我都唔識，但我好緊張呢個小生命出世。依家成個世界都轉變咗，要做番一個爸爸，要為BB努力工作，建立一個健康家庭。」
(蘋果日報)
