星二代演藝工份係有遺傳嘅，甄子丹同太太汪詩詩育有嘅一對子女，13歲囡囡甄濟如（Jasmine）同9歲囝囝甄濟嘉（James）各有天份，雖然唔係爹哋身手，但Jasmine能歌擅舞，上台冇怯場，James又彈得鋼琴又rap得。
子丹唔抗拒子女將來做娛樂圈生力軍：「o依家小朋友畀佢自己揀，我同太太唔係強迫性，當然都有基本。做父母都望子成龍，希望佢哋學多啲知識同學問，但都要睇小朋友興趣同天份。」
子丹畀子女好大自由度，未必一定強制大學畢業先有選擇權：「總之學識、教育基本要有，我唔覺得一定要要完成大學，視乎小朋友係咪夠成熟，同埋佢哋乖唔乖，對社會係咪有責任。」
可會為子女搭路入行？子丹話：「o依家好多人爭住簽佢哋，囡囡o依家得13歲，每次出嚟表演，好多圈內朋友都叫我將囡囡簽畀佢哋，囡囡唱歌跳舞係有天份，佢鍾意表演，囡囡一上台係咪霸，同平時兩個人，佢一口氣唱晒成首歌。囝囝outgoing，鍾意彈琴同rap。」
自問唔係虎爸嘅子丹，雖關心子女學業，但一定唔會畀太大壓力：「香港教育迫得小朋友太緊要，求學不是求分數，教育應該係啟發學生，唔係去攞分數，不過一定壓力係要有，畢竟小朋友太細個，都要去管制，佢哋未去到咁成熟，但我一定唔會為分數傷害我哋之間感情。」
Jasmine係子丹「前世情人」，兩父女關係密切，子丹將來係咪係呷醋外父？佢就話：「子女喺父母心中永遠係BB，你睇我囡囡以前細細個行catwalk，眨吓眼o依家大個咗咁多，我每拍完一部戲返嚟，佢哋都大咗，由BB變少女，再轉眼就變woman，我好開心亦忐忑。」
(蘋果日報)
