台灣女星侯佩岑喺今個月初於自己社交網站宣佈第二胎B仔早產，而且一出生就證實患有ABO新生兒溶血症，需要轉往台大新生兒加護病房，幸好經治療後，已經喺當日出院。
原來B仔離開台大後，同媽咪侯佩岑轉咗去禾馨民權婦幼診所，一來可以有兒科醫生睇住B仔康復進度，二來又有人照顧坐月嘅侯佩岑，而今日，侯佩岑再度更新社交網，佢話囝囝昨日滿月，而且母子都可以出院返屋企，侯佩岑留言感謝醫護人員嘅照顧，仲話：「再次感謝所有偉大的醫護人員，多虧有您，我們才能夠把孩子帶回到身邊，緊緊的抱着，所有的所有，盡在不言中……感恩再感恩。」
侯佩岑貼咗一張同囝囝額頭貼額頭嘅相，佢留言話：「寶貝，謝謝你來做媽媽的兒子，謝謝你的勇敢和努力，就像護理師阿姨說的，親愛的小勇士，謝謝你披荊斬棘的渡過難關，回到媽媽的身邊。」另外，佢再貼多咗一張相，係B仔握住媽咪手指，侯佩岑留言講番囝囝所患嘅新生兒溶血資料，仲叫啲準媽媽唔使太擔心。
最後侯佩岑貼咗張囝囝小腳板印，並代囝囝留語致謝：「感謝溫暖的禾馨醫療團隊，謝謝叔叔阿姨們照顧我和媽媽。」又cute又sweet！
祝BB健康快樂咁長大啊！
(蘋果日報)
