現年31歲嘅賴慰玲（Winki）與舞台劇演員男友梁子峰拍拖5年，今年7月8日生日當天仲突然喺網上報喜，公開懷孕嘅消息，而兩人亦於8月28日入紙申請結婚，雙喜臨門！
由於賴慰玲現時佗B七個月，腹大便便嘅佢就話婚禮唔會大搞，打算同屋企人簡單食餐飯，估唔到尋日兩人低調簽字結婚，正式結為夫婦。
榮升梁太嘅賴慰玲啱啱喺社交網宣布好消息，仲上載咗三張簽字結婚嘅花絮照，相中着上禮服嘅兩人簽字後頭貼頭合照，另一張相佢哋就十指緊扣，Sweet到爆！
賴慰玲仲冧爆留言話：「餘生請你指教。」佢又透露：「昨天，在家人的見證和歡樂的氣氛下我們結婚了！So Blessed」而佢嘅好姊妹陳嘉寶（Anjaylia）、蔡思貝及陳瀅都有在場見證，Anjaylia仲喺Instagram晒相，叫Winki永遠幸福咁話！
而同Winki喺無綫劇《殭》合作過嘅鄭嘉穎都有在場，佢仲慈父上身抱住小朋友，唔知女友陳凱琳有冇去到呢？
Cheronna就話自己身處泰國，呻見證唔到呢個時刻。
Winki接受訪問，佢話簽字時內心超激動，但要扮鎮定，佢話：「以前成日睇人簽字咁感動，原來到自己發生，係會咁激動，但要扮冷靜，只係默默流淚，件事係充滿愛嘅，抬起頭見到大家都喊緊，蔡思貝仲喊到缺堤，真係好感動！另外現場嘅得意事，就係我姪女好得意，大家都爭住抱佢，佢真係好可愛呀！（會唔會再搞婚宴？）應該唔會喇！」
(on.cc東網)
