鍾景輝（King Sir）、謝君豪、菊梓喬等今日到何文田培正中學出席港台《有聲好書》活動，佢哋會聲演不同書目。
King Sir上年11月證實忠上腸癌，接受微創手術後出院返家休養，今年3月80歲壽宴筵開擺60圍，今日現身時精神唔錯，佢話參與活動一啲都唔辛苦，自己好鍾意，仲話：「可以了解作者內容、風格、寫作節奏等等好有趣，能夠運用自己把聲傳達訊息係一個好開心嘅演繹方式。」演舞台劇定聲演難啲？經驗老到嘅King Sir話：「各有各難處，演員就要肢體動作加埋個樣，聲演就係另一種趣味靠把聲。」
King Sir精神奕奕，佢話早前都客串咗大台一套台慶劇，但基於唔想太辛苦，只係客串一集， King Sir話：「驚太夜太辛苦頂唔順，因為要好集中注意力，等我遲啲身體再好啲先啦。」King Sir現階段着重多休息，因為11月就要同李銘森導演合作《小井胡同》舞台劇，一共八場，King Sir到時會親自監導，但唔會上台。菊梓喬自小就被批評有懶音，後來佢先發覺唔係懶音，而係直頭唔識個字，o依家要惡補，每次都會拼音做足準備先入錄音室。
劇集《使徒行者2》劇透議論紛紛，菊梓喬主唱劇集主題曲，佢話：「係一首洗腦歌，自己都有追劇集，不停有人出不停有人死。」
(蘋果日報)
