民間有傳生仔個鼻會大啲，個肚會尖啲!睇番近日大台播《胡說八道真情假期》，大肚嘅杏兒亦真係個鼻大咗好多，有咗之後，杏兒一直唔講BB嘅性別，又話每次照超聲波，BB都摺埋重要部位，又話有長輩未返香港，所以唔講得，點知轉頭就被老公李乘德(Philip)「破壞」咗個計劃，老公Philip喺Ig貼咗親友送嘅一啲B仔衫，仲有一件係阿仙奴嘅BB衫，一睇就知杏兒係一索得男，陀住李家嘅慈姑椗。
38歲杏兒下個月尾就生B，老公Philip係客家沙頭角禾坑村原居民，三代單傳嘅男孫，生仔有丁權，B仔個名又可能要跟族譜排字輩，今日有周刊指，杏兒第一胎就生仔，李家都好開心，奶奶仲由英國飛咗返嚟香港照顧新抱，下個月李家啲長輩都由外地返港，鄉親父老見證李家添丁，報道又指杏兒都想順產生B，就可以快啲追多一個B，坐完月，明年初又再造人，望40歲前，生三個小朋友。
(蘋果日報)
