郭晶晶今年4月為老公霍啟剛誕下一女，休息一排，上星期四產後首次喺香港現身，出席一個慈善跑活動記會。
愛心爆棚嘅郭晶晶，今日又為慈善跑記者會擔任嘉賓，佢同李小鵬喺中環出席「健康快車 建行(亞洲)慈善步行跑記者會」，會上小鵬同晶晶一齊玩遊戲，體驗患眼疾嘅苦況，又教大家熱身拉筋，小鵬被笑手瓜起蹍，佢笑稱係經常要抱分別五歲多同一歲多嘅仔女所至。
小鵬又話會帶大女去學唔同嘅運動，打網球、游水同騎馬，11月25號會帶埋對仔女參加慈善跑。
而已經第三年做大使嘅晶晶，就被爆上年參加慈善跑時已經懷孕，晶晶就搞笑話：「孕婦是需要運動的。」晶晶輕易咁示範拉筋動作，原來每日晶晶都習慣做拉筋，有時間仲會跑步，問到一對仔女嘅性格，晶晶話：「細嘅還未知，哥哥很活躍。之前有參加游泳班，但他不喜歡，已經沒有繼續學。」
問到囝囝中曦係咪好識冧爺爺霍震霆？晶晶笑話：「係，爺爺見到佢會好開心，佢會同爺爺講I love you，都會同我哋同嫲嫲講。」提到碧咸前日接受訪問時被問到幫仔女上車，碧咸就話仔女做乜都會支持，咁問到晶晶會唔會買樓畀仔女？晶晶就話：「冇諗咁遠。」係咪會將最好嘅留畀佢哋？晶晶話：「盡量啦。」而中秋節，晶晶就話會一家人食飯，佢仲買咗個紙燈籠同囝囝一齊整，晶晶話自己好鍾意做手工，平時都喜歡針黹。
(蘋果日報)
