34歲嘅苟芸慧（苟姑娘）同44歲男友、錫礦大王後人陸漢洋拍拖冇耐經常傳出婚訊，早前男友仲送咗陸媽媽留俾佢嘅家傳鑽石鑲製而成嘅訂情戒指，女神正式封盤！
今日有周刊報道，陸漢洋終於有行動，早前有人見到佢哋二個人去咗西半山睇豪宅，日前佢哋仲齊出發去意大利，苟姑娘就睇時裝騷，陸漢洋就去賽車，聽講陸漢洋仲計劃好喺呢個旅程求婚兼舉行訂婚儀式，甚至搵埋攝影師，到時同女友影埋結婚相！
報道仲話佢哋嘅婚禮預計喺明年初舉行，因為苟姑娘嘅屋企人都喺加拿大，所以婚禮其中一站會喺加拿大，不過香港嘅形式就仲未決定，所有嘢交俾苟姑娘決定喎！而佢哋接受周刊訪問時，陸漢洋就未有否認呢伴事，話睇吓工作嘅安排，跟住話等佢哋返嚟先話俾大家知！
(蘋果日報)
