享盡齊人之福嘅43歲嘅澳門賭業猛人周焯華（洗米華），佢同正印陳慧玲（Heidi）再加埋情人Mandy Lieu嘅三角關係，已經成為城中熱話，嗰陣因為洗米華同Mandy嘅「世紀一拖」，搞到Heidi決定離婚。
不過最後喺洗米華極力挽救下，成功冧掂老婆Heidi撤銷離婚申請，另一邊廂又用銀彈政策o氹掂Mandy Lieu乖乖留英國，結果兩頭住家和氣收場。
本來呢段三角關係沉寂咗一時，但係點知喺今年6月，洗米華去咗夏威夷參加老友澳門德晉集團百億CEO陳榮煉同台灣女星安以軒婚宴，攬住日模松岡李那跳舞，搞到Mandy嬲嬲豬，仲有傳話佢越洋用WhatsApp鬧爆松岡。事後有傳洗米華飛咗去英國o氹番Mandy Lieu，仲先後有讀者喺英國唔同地方捕獲佢哋兩個！
喺英國受恐襲前一日，即14日嘅下晝5點左右，有讀者黎小姐透過「爆相爆片」，喺倫敦Harrods行街，黎小姐話：「嗰陣我見到佢哋啱啱睇完女裝，跟住撘電梯去咗睇童裝，不過個男人喺嗰兩程電梯好熱情，好主動擰轉後面錫咗Mandy 4、5次！行到去童裝部，佢哋都男仔女仔嘅衫都有睇吓！」
黎小姐仲話：「其實男嘅警戒性都好高，見佢周圍望，佢都有懷疑我影佢，係咁望住我哋，不過喺現場都有一批香港人見到佢哋，有唔少人對佢哋指指點點，但係佢哋都冇乜點理！」
提到英國受恐襲一事，目前仍喺倫敦嘅黎小姐，被問到倫敦受襲後嘅市面情況，佢話：「我都有睇到新聞，不過因為我近st. James’s park，同事發地點都有半個鐘車程，啲人淨係叫唔好去嗰邊，佢哋又唔係好驚喎，雖然佢哋咁講，但係我都唔係好敢去嗰邊！」
另，松岡李那原計劃噚晚由日本飛到倫敦睇分別喺英國時間16日及17日嘅兩個時裝騷，其經理人王友良回覆《蘋果》話松岡已經決定取消行程。王友良話：「其實今朝北韓發射導彈（飛越北海道上空），佢已經冇乜心情，o依家倫敦又發生恐襲，兩件事令到佢決定取消倫敦行程，留番喺日本陪佢父母。」
(蘋果日報)
