名模周汶錡（Kathy）出席「癌症基金會粉紅革命」啟動禮，Kathy表示做媽媽之後特別注重健康：「生完小朋友之後心理上真係會轉變，以前就算病、唔夠瞓都冇呢個諗法。依家唔舒服就會好緊張邊個湊阿仔，可能荷爾蒙影響。（幾耐會身體檢查一次？）半年，覺得密啲Check會好啲。」
Kathy認為做媽媽很偉大，特別以前一代的媽媽，要身兼多職十分利害：「佢哋又要番工、湊幾個仔、養起頭家仲要煮飯。」她表示身邊朋友做媽媽之後，都會出現對自己小朋友過分緊張的情況：「佢哋真係會擔心好多嘢，未發生就擔心，而我就發生咗先擔心。我覺得要均衡吓，點到即止。」
她又覺得現時的小朋友比以前不同：「以前嗰啲好乖，依家比較活躍，可能階段唔同，個認知好快，所有依家啲人要醒啲。」
而日前細妹周麗淇在社交網表示周汶錡大仔Jacques因為曳而令她生氣，Kathy說：「我唔知，嗰日唔喺度，可能出咗去食晏扭計。我個仔依家氹人好叻，做錯嘢知我會鬧，佢就會扮冇嘢，一分鐘後就會講『媽咪sorry』。（佢都好有經驗？）係呀，依家小朋友諗咩係估唔到，會諗嘢氹番我笑，所以我要用其他方法對付佢，依家做媽咪要鬥智鬥力幾辛苦。」
(on.cc東網)
