現年45歲嘅戴耀明係TVB綠葉王，入行二十五年，有「御用傻仔」之稱，相信好多觀眾都認得佢，不過就未必知佢叫咩名，但佢女神你就一定識，就係佘詩曼，原來戴耀明更曾向阿佘示愛！
有報道指，2003年，戴耀明同阿佘拍完《金枝慾孽》做咗好朋友，佢曾同阿佘講，話將來搵到錢要娶佢做老婆，又試過飲醉酒以短訊示愛話好掛住佢，不過戴耀明話預咗阿佘拒絕自己，希望將來可以有機會同佢拍戲有感情線，當係一個回憶。被記者問到此事，戴耀明更大笑：「我哋係好朋友，成日同埋阿戚（戚其義）成大班演員聚會，呢啲係講笑嘅說話，我哋嘅距離係10萬億咁遠，望吓就夠！」佢仲話：「不過阿佘真係好正，有時比男人仲男人，但係有時佢又好女人，性格又爽直，佢真係數一數二嘅珍品，難得一班朋友咁玩得，真係好難得！」
而家感情方面，佢同拍拖5年嘅圈外女友分手，戴耀明話：「其實分咗手都有一段時間，心情都已經平伏晒，童話故事只會喺劇集裡出現，兩個人相處，唔係淨係話好鍾意就得，有時位置太遠，一定會有好大壓力。」
感情失意，事業卻得意。報道仲話，戴耀明將會返大陸拍劇做男主角！戴耀明：「今次會同曹查理合作拍一套時裝劇。」咁係咪會北上發展？佢話：「其實真係好好彩，好多謝大家俾呢個機會，我o依家都未有確實計劃，我同公司仲有合約，而且喺大陸又冇經理人，係自由身，所以諗住邊拍邊學，慢慢再決定！」
報道話戴耀明今次喺大陸拍劇酬勞可觀，拍一組戲已經等於喺香港兩、三個月人工，佢就話：「始終上面有好多電視台，唔係好似香港得一間，變咗需求自然大，喺綠葉演員嚟講，我已經算平，好似同一個級數，出得嚟認得個樣，起碼有四、五萬一組，就算嗰啲企喺皇帝身邊嘅太監，都有兩、三萬一組，我只係中位價。」
（蘋果日報）
