譚小環同老公蔡強榮（Eric）噚日慶祝結婚十周年，佢哋冇喺五星級酒店燭光晚餐，亦冇撐枱腳，反而約埋「大佬孝」邵仲衡gathering，多咗個電燈膽，兩公婆不但唔嫌佢阻碇，反而多隻腳仲傾得開心啲。
小環上周三過45歲牛一，佢都係低調慶祝，噚日911係佢同Eric結婚十周年，中間出現過小風波，但都可以平安過度，Eric坦言結婚周年同生日都畀老婆大利是做禮物。
小環講到夫妻相處之道，佢話：「我覺得最緊要大家包容同信任，我哋遇到乜嘢問題，大家會拎出嚟講，一齊有商有量去解決。十年真係唔係短嘅日子，所以都好感恩，我都會好珍惜呢段感情。今年最開心係同埋好多朋友一齊慶祝，切咗幾個蛋糕。」
（蘋果日報）
