歌手李克勤假紅館舉行的一連9場《李克勤慶祝成立30週年演唱會》圓滿落幕，在慶功宴上，克勤謂首先要感激校長譚詠麟（阿倫）前來擔任嘉賓，對方事前更非常認真準備：「佢想好有誠意咁唱我嘅歌，比較少唱嘅，我知佢一直都鍾意《一個人飛》呢首歌，但佢話佢唔係好熟，想早一日嚟綵排，嚇得我！佢又着到好靚仔嚟，誠意十足咁，我係感動嘅，無論去到邊，咩地方佢都會嚟撐我。」他又透露稍後將參與一場雙打羽毛球的世界之戰，他會與溥儀老闆邱子傑一隊，而阿倫則會與他的太太盧淑儀一隊：「你覺得我贏嘅機會係幾多？我覺得會係零囉，一個我老婆，我贏咗返去梗係要跪玻璃啦，一個係校長，贏咗又要殺頭啦。（你放水？）唉，邊走邊射啦。」
提到克勤的電影導演夢，問到老闆楊受成打本給他可有限制？克勤說：「佢冇同我講喎，其實我今年三月已經同佢講我想拍電影，但我都未同佢講到錢，佢已經話得，仲問我使唔使要錢，或者搵人寫劇本，要就話佢聽，我就話我去組織吓個班底先。」他又透露希望參與埋劇本創作，拍攝一套有香港特色的溫馨愛情小品：「第一套唔會好高騖遠住先嘅，同埋過去半年我都問咗好多電影前輩同朋友，取咗經，完咗騷之後嚟緊嘅大project就係呢套電影。」問到角色人選？他坦言完全未諗，而自己可能只會客串做路人甲，因他想專注做導演。至於可會叫太太一起客串？他說：「唔會啦，呢啲唔關佢事，係我送畀自己嘅50歲生日禮物。」
而克勤在演唱最後一首歌時不禁落淚，他坦言事前完全沒有預料到會喊：「講真，演唱會做咗好多次，嗰啲燈海我都見過，但當再一次見到呢個畫面，係會好唔捨得，啲歌迷又跟咗我咁多年，係感動嘅。」
提到徐濠瀠亦連續五晚來捧場，克勤表示好多謝對方：「我知佢鍾意我啲歌，同埋我哋以前都係藝能嘅，但咁佢梗係鍾意Eason（陳奕迅）啲歌多啲啦，呢樣唔使問。」
(on.cc東網)
