一句講晒，鮑姐定家燕姐？
點解會咁問？因為大台兩套黃金時段劇集，分別以67歲嘅家燕姐同68歲嘅鮑姐做主角，啱晒一班念舊嘅家庭觀眾。
不過後生一輩搵到新睇法，將《同盟》入面嘅鮑姐奉為新女神，證明愛係無分年齡。有人喺連登討論區開post，鮑姐幾個投票都拋離對手幾條街，家燕姐應該都輸得心服口服喇。估唔到嘅係，佢仲連贏司棋姐同港姐冠軍雷莊兒，最勁係贏埋細一個對，只係得34歲嘅李佳芯。
呢件事連瓊姐都感到震驚，喺facebook專頁開post，兩個choice都係「鮑姐好正」同「鮑姐好索」，真係公又我贏，字就你輸，真係你玩晒啦。
連監製文偉鴻留言話要通知鮑姐，然後無耐鮑姐現真身留言「咁搞法！笑死人了！」網民一致撐鮑姐，話鮑姐夠晒煮家婆feel，但睇唔慣佢做黑社會大佬。
不過同劇嘅對手梁舜燕、韓馬利都係老戲骨，唔知佢哋幾時會俾人發掘呢？
(蘋果日報)
