筱靖、趙哲妤、可嵐及張家慧等噚晚喺郵輪碼頭出席活動，全部嘉賓都着住上傳統中式嫁喜裙褂，其中筱靖就話自己着住裙褂個樣係奶奶最鍾意嗰類型，佢笑言：「我塊面圓碌碌，睇落好好生養嗰種，今日呢套褂係同當年諸葛紫岐出嫁着嘅同款，希望着住佢可以好似佢咁嫁入豪門。」
不過之前有相士話筱靖係辛苦命：「要靠自己創一番事業，所以喺有愛情之前，要先為自己事業打好根基。」佢話將來揀老公，唔需要對方好有錢：「佢冇錢都唔緊要，我有即係佢有。」目前經營餐廳生意嘅佢話：「最希望是做好自己生意，但因為成日請唔到人，有時連樓面洗碗都要兼顧埋，加上自己又蠢，所以要更加勤力。」
另外，趙哲妤就話今次係佢產後第一次行騷，自言已經行過超過百次婚紗騷，仍然想喺現實中着婚紗。目前為單親媽媽嘅佢話：「相信可以認識一個好男人，o依家嘅擇偶要求同以前好唔同，覺得年紀大啲有啲經歷嘅人反而仲好，即使離過婚都唔介意，最緊要心地同品格好。」
(蘋果日報)
