真係無陰功啊。。。
洪卓立（Ken）同湯怡今日情侶檔到尖沙嘴，出席護膚品品牌活動，一向皮膚白滑嘅阿Ken話，平時護膚都係交晒畀女友負責，旁邊嘅湯怡就話：「佢平時喺屋企好似大爺咁，坐喺度攤大手要我幫佢敷Mask同搽Cream。」
正喺台灣拍劇嘅Ken表示，呢幾日抽時間返嚟香港出席活動，仲話特登早一日返香港俾驚喜女友，旁邊嘅湯怡就話：「佢返嚟又唔通知我，嗰晚咁啱係農曆七月十四，我一個人喺屋企夜晚沖涼嘅時候，聽到兩隻狗對住個門口係咁吠跟住又有撞門聲，我嚇到即刻反鎖自己喺廁所唔敢出去。」
一心想整蠱女友嘅Ken話 ：「我係諗住嚇吓佢，特登一手揸住電話拍片一手撳住個防盜眼，然後搵隻腳踢門，點知踢咗成分鐘都冇人應門，心諗佢應該係驚到唔敢開門，於是就自己開門入去。」最後阿Ken發現女友被佢嚇到喺廁所喊，真係無陰功。
講到同門嘅羅力威承認早前已經向女友雨僑成功求婚，Ken話：「其實我都知道少少，佢想去求婚嘅地點我之前去過，佢有問過我當地有啲咩嘢玩同有啲咩食。」見到同門求婚成功，問到幾時有到阿Ken同湯怡？阿Ken就依依哦哦話：「暫時事業為重啦。」
(蘋果日報)
