做咗人妻嘅舒淇，今晚喺中環出席時裝活動，著住黑色緊身衣加外套出席嘅舒淇，喺台上被問到近日忙宣傳新戲，有冇時間休息時，舒淇話：「今日唔同往日，o依家生活上想享受吓。」係咪因為做咗人妻關係想多時間享受生活？舒淇就話：「唔係，都撈咗咁多年，o依家需要有足夠睡眠，食多啲生果同做多啲運動，個人先至會紅卜卜。」
前日係舒淇同馮德倫結婚一周年，問到舒淇嗰日點慶祝，佢笑笑口話：「唔係前日，不過我唔會話你聽係幾時。」佢只話結婚周年紀念嗰晚只係食飯，冇乜特別慶祝。問有冇送禮物俾老公？舒淇話:「冇呀，佢都唔喺香港。」舒淇早出前出席活動，曾經講過要減產，希望多啲時間嘆吓世界，唔知O依家係咪想工作愈少愈好？舒淇話：「係呀，一直以嚟做咗咁多年，由10幾歲開始都冇休息過，都係時候要享受人生，事業要擺低少少，自己心目中係食極唔肥，瞓極唔肥，好想懶。」
講到有報道話佢戴咗條「齊心結」手繩，求夫妻和睦同有BB，舒淇反問:「係咩？乜嘢叫齊心結？我嘅繩係保護自己出入平安，好多嘢都係順其自然。身體健康係最緊要。」
(蘋果日報)
