育有一子嘅歌手官恩娜（Ella）早前宣布懷有第二胎，現時佗B近五個多月嘅佢，家中一直養有狗仔Bisous，不過早排因為嚴重孕吐，就將愛犬交由工人姐姐打理，點知佢就發現姐姐冇幫Bisous刷乾淨啲牙，依家佢就決定落手落腳做番。
不過呢個都唔係重點，因為Ella自己「湊」番Bisous，接觸多咗，加上佢鼻敏感愈嚟愈嚴重，佢就去咗做血液測試，竟然發現原來佢係對貓狗毛敏感！雖然大住肚，又有鼻敏感，不過Ella都依然決定要自己照顧番Bisous，戴住口罩為Bisous刷牙、剪趾甲、梳毛，仲會滴定防敏眼藥水，因為佢堅決絕不棄養：「呢個承諾係一生一世嘅！唔可以因為大肚或者有咗小朋友就棄養或者唔理自己隻狗！之前因為嚴重鼻敏感，做咗個血液測試發現原來我對貓狗（毛）敏感！但我都冇一刻諗住唔要Bisous！依家幫佢刷牙同梳毛嘅時候會戴埋口罩同滴定防敏眼藥水！咁就okay😉！」
今次Ella嘅「絕不棄養」承諾絕對係為大家做咗個好榜樣，所以個Post一出，就好多人爭住畀Like，又大讚佢做得好，不過都有網友提醒Ella照顧Bisous時都要照顧好自己。
(on.cc東網)
