吳君如喺開學日前大手入貨，一買就買咗6對鞋俾阿女陳是知，升中一後每日都可以換新鞋。
淨係買鞋都睇得出君如有幾錫個女，如果睇埋佢平時啲生活相，可能會仲羨慕。平時君如一家三口好識把握時間享受家庭生活，好似早排君如生日，成家人就喺英國慶祝生日，喺大草地跳起Yeah，生活好寫意。
君如同是知關係融洽，因為咁多年嚟君如花咗好多時間陪阿女，佢曾經喺專訪講過，無時無刻都會陪是知讀故事書，可以喺車上講、放學又講、臨瞓前都講。近年君如就鍾意同阿女睇戲，等佢唔好成日玩手機。
至於教女方針，君如都幾特別，佢話過阿女講大話唔緊要，因為實有講大話嘅理由，但最重要係自律。
佢仲話小朋友係要逼，做唔99分都要做到90分，以免將來阿女埋怨唔栽培佢。是知進入青春期，對感情關係都好敏感，君如話阿女最近好關心爸爸媽媽情史，但原來君如唔想阿女咁早拍拖，仲俾埋時間最早要21歲先拍得。
(蘋果日報)
