林敏驄、林盛斌（Bob）同蔡瀚億（BabyJohn）、張繼聰同鄭欣宜等，今日出席旺角hmv旗艦店開幕，有傳BabyJohn太太懷孕，佢話：「唔係嘅，如果有好消息，一定同大家分享。」佢強調兩公婆健康狀況冇問題，至於生BB就順其自然。
BabyJohn話自己大部份時間喺大陸工作，佢話：「喺香港放工回家，太太都瞓着咗，我起身佢都返咗工。我唔心急，身邊有小朋友嘅朋友都介紹我秘笈。」BabyJohn笑言身為「繁殖學會會長」嘅Bob同張繼聰已為人父，佢哋都畀咗好多意見畀BabyJohn，佢話：「我哋順其自然。」
「繁殖學會會長」嘅Bob就話：「多謝畀美譽我，家中多咗小朋友真係開心咗，三個女放學返嚟攬住細佬。」Bob話最初睇到報道話BabyJohn太太有咗，佢第一時間恭喜，但原來「食詐糊」，Bob話：「我就介紹中醫畀佢調理身體。」醫師係「生仔聖手」嗎？ Bob話：「我生女多。」
張繼聰就話：「屋企如果有小朋友，爹哋做嘢有動力。」張繼聰嘅貼士係最緊要多啲留香港，佢話：「同太太見面少都難啲，要保持心境年青，三十多、四十歲標尾會比較難，但十幾歲突然無啦啦有咗。」
張繼聰同Bob笑言叫BabyJohn可以試着校服同靜嘅地方，唔好畀爹哋媽咪聽到 。同場欣宜話佢間餅店中秋節預計生產一萬盒月餅，所以忙趕貨，過節都陪唔到爹哋鄭少秋，欣宜話：「我成副心機同銀行積蓄都投入賣餅，希望老闆可以畀間店佢賣餅。」
(蘋果日報)
