仲早過杏兒自己個BB出世﹗
由藝人胡杏兒創立的婚紗品牌舉行時裝騷，腹大便便的杏兒穿上粗高跟鞋配拖尾長裙示人，她表示今次是第二度舉行時裝騷，比上次大型得多，可招待500名賓客。問會否感到很大壓力？她回答：「唔會，只係大家都話我大肚仲咁操勞，但冇辦法，每年都要搞。（老公有冇詐型？）有少少啦！佢怕我操勞。」
杏兒還有另一件事要宣布，就是婚紗品牌會在上海開分店：「十月中會開店試業，我唔會飛過去喇，我預產期係十月尾，上海嘅『BB』仲早過我自己個BB出世。等我生咗，收埋身先搞grand opening（開幕禮）。（忙完今晚就停工休息？）唔係，仲要拍廣告，唔會好辛苦。（之前你上載喺上海食小籠包照片，係咪好好胃口？）依家好番，最初胃口好差仲瘦咗，依家肥咗20磅。（知道BB性別未？）未知，因為有啲長輩喺英國未返嚟，所以叫醫生唔好講住，一次過先公布。BB好百厭，成日打斛斗。（買晒BB嘢未？）未，唔想封塵。（會唔會叫品牌設計BB衫？）設計咗啲衫畀我先，因為大肚衫好難買。」
(蘋果日報)
