藝人呂慧儀到將軍澳電視城出席《愛．回家之開心速遞》之「開心家長日」宣傳活動，剛於9月3日過35歲生日的她，獲劇組送上生日蛋糕，與同是9月生日的鄭世豪齊齊慶生。
老公驚喜慶生
問到生日如何度過，呂慧儀笑說：「9月2日嗰晚都收得夜，返到屋企仔仔黃柏翹（蟹籽）迎接我，平時佢都瞓咗㗎喇，佢啱啱喺上個月過3歲生日，佢就以為個個都係3歲生日，佢話媽咪你3歲生日呀，然後帶咗我去雪櫃睇蛋糕，原來老公準備12點畀我驚喜！已經3年冇喺正日慶祝，咁啱老公都放假，當然送蟹籽去畀老人家湊，等我同老公過吓二人世界啦！（老公有咩表示？）都係送首飾，保值嘅，佢話我平日開工少戴首飾，叫我粗戴，佢會努力啲賺錢，或者叫埋蟹籽幫手賺錢喎，最開心當然係蟹籽錫我嗰兩啖啦！」
唔怕生多個
問有否計劃為蟹籽添個弟妹？呂慧儀笑言：「等丹爺（劉丹）公布加幾多集先，其實都有諗，天意注定有都可以，就冇強求嘅。（怕蟹籽呷醋？）都要，上次老公同我玩作勢打我，佢竟然打番老竇，所以會同蟹籽傾吓，叫老師幫手嚴厲管教。」
(東方日報)
