前有線主播陳貝兒（Janis）驚爆同結婚6年嘅商人黃國棟離婚，日前出席活動時直認二人已分居，仲講到喊晒口。
陳貝兒喺新節目《嫁到這世界邊端》中，被指觸景傷情，諗起自己感情事，就忍唔住喺鏡頭前爆喊。但其實節目亦有溫情一面，貝兒仲邂逅一名小鮮肉添。陳貝兒喺分居期間，隨製隊去丹麥哥本哈根，訪問港女Perla，佢透過網戀，越洋嫁畀丹麥男Jasper，婚後生咗4歲半混血小鮮肉Andreas。
Perla話囝囝性格內向，只講丹麥話，雖然同陳貝兒雞同鴨講，但身體語言打破佢哋年齡隔膜。Andreas喺四日內勁黐陳貝兒，仲讚佢係「仙女姐姐」，陳貝兒返港後，仍有同Andreas拍片傳情。而Perla日前喺facebook貼文爆Andreas突然好掛住陳貝兒，童言無忌問媽咪：「我真係好掛住佢呀，我可以點做？」Perla就o氹囝囝遲啲返港探姐姐。
陳貝兒日前接受傳媒訪問時，笑言向來好有小朋友緣，佢話：「我男女通殺，反而成年人就要培養吓。我同Andreas相處四日，佢好跟我，成日拖住我，我走時佢又送我出機場，仲話唔捨得我走。基本上佢講丹麥話，我同佢溝通唔到，都係hug同kiss。」問到現實中可唔可以接受姊弟戀？佢話：「睇緣份，年齡唔係問題，要大家溝通到。(會唔會學Perla透過社交網覓第二春？)我仲未到deadline，我啱啱先重出江湖，可以觀望吓巿場先，我對愛情仲有憧憬同勇氣㗎。」貝兒直言現在仍未ready接受新一段感情，靜待下一段緣份，先享受一個人生活。
(蘋果日報)
