現年47歲嘅陳慧珊，先後有過兩段婚姻，無獨有偶，兩任老公都姓鍾。陳慧珊曾經係大台當家花旦之一，但其實佢喺走紅之前，早已為人妻，與當年的花旦多為未嫁雲英嘅「趨勢」有啲唔同。
陳慧珊嘅首任老公係大學教授鍾偉明，網上流傳，當年陳慧珊同鍾偉明邂逅，係因為鍾偉明赴美求學，剛好租中陳慧珊屋企，每日鍾偉明都會刻意咁等埋陳慧珊出門，然後扮偶遇再打個招呼，再車埋陳慧珊返學，請佢食早餐。
當時陳慧珊已經鍾意咗呢個「香港仔」，最後兩人拍拖7年拖就決定結婚。咁啱，當時佢哋覺得喺美國冇乜發展機會，所以決定返香港博一博。就係咁，陳慧珊加入咗無綫明珠台新聞部，擔任新聞節目及天氣節目主持、記者及編導等工作；兩年後，更係鄧特希幫助下，轉過去翡翠台，正式成為藝人。唔知叫唔叫好彩，陳慧珊憑住套劇《壹號皇庭V》走紅，成為無綫力捧花旦之一；另一方面，佢同鍾偉明越走越遠，最終搞到離婚收場，於2001年正式分手，幸好兩人再見亦是朋友。
之後，陳慧珊專注演藝界發展，拍劇、唱歌，演藝事業推向高峰。到咗2006年，傳出與男友兼經理人鍾家鴻（Mike）結婚，翌年更被揭大肚，結果陳慧珊親認自己已經結咗婚，同年9月誕下女兒鍾律然。不過，Mike於2012年2月入稟高院自行申請破產，佢聲稱身為市場推廣公司老闆，因公司運作不大順利及遇上糾紛，自己又唔想糾纏落去，故與律師研究後決定申請破產，當中不涉及妻子，對家人生活亦不會構成影響，就係咁，陳慧珊獨力孭起頭家，接job、顧家、湊女全包。2014年甚至有傳陳慧珊被老公打，但佢否認，話係撞到私家車門車，先搞到「爆缸」流血。
(蘋果日報)
