「巨聲幫」陳國峰(Penny)舊年同圈外女友黃思雅結婚，婚後二人努力造人。
5月中，Penny率先喺微博透露老婆陀B仔嘅喜訊，今日Penny喺微博宣佈B仔出世啦。佢留言話：「同大家報個平安，感謝大家嘅祝福同關心，托賴母子平安。」
至於B仔未出世前，陳國峰原來孖老婆影咗輯超激全裸大肚寫真，Penny貼相留言話：「留住最美嘅一刻，過去咁多個月真係值得記念，辛苦妳了老婆。母親的偉大，希望一切順順利。」
一索得男嘅佢，仲有份入產房幫B仔剪臍帶，不過由於太緊張同頻撲關係，搞到新手爸爸滿面鬚根都冇時間剃。
陳國峰話以前唔知媽咪有幾辛苦，呢家就深深體會得到。
至於同太太影全裸寫真，陳國峰就話：「其實我有着褲嘅，輯相就上個月影，點解會影呢？就係一直都未影過啲咁激嘅相，主要係想影吓個肚，咪借住呢次機會影囉，成輯呢張最激啦，影得好靚，多謝攝影師佢哋。」
（Apple Daily）
