9歲香港「小巨肺」譚芷昀（Celine）已成功殺入美國才藝節目《全美一叮》（America’s Got Talent）嘅準決賽，21位準決賽參賽者，大家最關注Celine同10歲「小雲妮」Angelica Hale係咪會正面交峰，畢竟佢哋兩個都憑Golden Buzzer（黃金按鈕）直入半準決賽，有指Angelica喺下周二美國時間出賽，而經理人蕭定一日前證實Celine係本月12日先出賽，所以兩位小妹妹要齊齊殺敵，才可於決賽碰頭。
其實「小雲妮」Angelica參賽時，佢媽咪已挺住巨肚撐場，Angelica今日喺Instagram報喜指兩日前剛升呢做姐姐，佢仲貼咗去醫院探妹妹Abigail嘅相，形容細妹係最快樂嘅小妹妹出生，妹妹Abigail兩日前出生，「我做了姐姐，我好開心見到我的妹妹」，相中嘅Angelica用手捉住妹妹小手，其後再貼出一張抱着妹妹嘅相，只有10歲嘅新手家姐，算係幾熟手，佢笑到四萬咁口，Angelica出賽前家中添成員。除咗死敵「小雲妮」Angelica，另一個對手Angelina Green亦唱出超水準，相信Celine要贏都唔係咁易。
Celine對自己都幾有信心，噚日喺facebook留言，未知係唔係佢爸爸譚順生代筆，Celine就話今年有機會加入AGT，已經好高興，覺得學到好多嘢，亦識咗好多新朋友，認為自己係9歲嘅小朋友，好幸運有家人支持自己嘅夢想，又多謝爸爸教佢唱歌，讚爸爸係佢生命中嘅歌唱老師，用咗好多時間同精力每日教佢唱歌嘅技能，仲話”I am so luck to have you Daddy. I am walking step by step to final.Yeah!(我真的很幸運有你，爸爸。 我一步步走到決賽)”
此外，Celine今日凌晨又喺facebook貼出同評判Howie Mandel嘅合照，就話喺後台遇到Howie，形容Howie係非常好嘅人，感謝Howie嘅意見同支持，Celine將會盡力出戰AGT半決賽。
(蘋果日報)
