第一份工，打足十年，呢十年起跌令江若琳銳變。
今年入行十周年，9月30號牛一變30歲，青春歲月就喺娛樂圈度過，3650日令江若琳變…變…變…江若琳講到十年前嘅自己：「我19歲入行，第一份工就做呢行，當時好似一張白紙，每日都戰戰兢兢，每日都驚會做錯事，唱錯歌詞、拍子唔啱又怕公司鬧，出嚟訪問又唔識對答，怕講錯畀人亂寫，怕行一步都踩親地雷，似一隻驚弓之鳥。」
十年遭遇，江若琳變化很大：「十年時光，我發現無論幾乖，每步點行都會中流彈，所以十年後嘅我，比以前自在瀟灑，每日都唔知發生乜嘢事，點小心都預計唔到，我o依家會比十年前自在咗。」佢話o依家訪問時，可以做到隨心所欲，事無不可對人言：「o依家我識享受每日工作同傾偈，好多嘢睇化咗。」「十年前我係一朵好受保護溫室小花，屋企父母愛護，入行又有好多人保護，但我入行後經過無數風吹雨打同踐踏，呢朵小花冇晒花瓣，佢變咗生命力好頑強嘅一棵雜草，即使惡劣環境都可以生存。」
女人由20歲變30歲，呢個數字跳級，心情忐忑，但江若琳就認為好有意義，仲形容係美麗嘅開始：「我覺得係女仔最靚新一頁，女仔由20歲變30歲，唔好怕跌倒，我哋有最好嘅青春，唔好怕失敗，要不斷尋求美好。我分享呢十年，就算遇到幾多個『人渣』都唔使驚，就算情傷都唔使驚，幾多次情傷都唔怕。」愛過跌過痛過，即將30歲江若琳話終於知道甚麼人可以陪伴終老，同時佢亦找到夢想，所以開心迎接做「一枝花」。
江若琳今年4月公開與「生煎包王子」蕭潤邦相戀，友人都認為佢哋合襯又合拍，結婚走唔甩，江若琳話：「哈哈，每次出嚟大家都好急，我哋開始唔係好耐，我同佢識咗十年，唔知個天點解安排我哋要走埋一齊，會唔會有下一頁？我哋o依家好享受自由時光，天會安排下一步，我冇結婚plan，我女仔嚟，應該問佢。」少女都會憧憬出嫁，江若琳直認不諱：「細細個時，5歲、8歲就諗住18歲攞成人身份證就結婚，到咗18歲入咗行，又想事業衝刺，心諗結婚推到25歲啦，人生真係好多計劃。」
江若琳即將步入30歲，佢話一切隨緣：「遇到可以行到最後嘅人好難得，希望可以35歲之前，唔知會唔會突然出現，等天安排。」江若琳係一個好感恩嘅人，佢話呢十年好多人要多謝：「一定要多謝仲喺我身邊嘅朋友，當你行得好順利，朋友特別多。當你跌低時，到底呢班朋友仲喺唔喺度？可能十個走剩兩個。我要感謝呢啲時間，咁快睇到乜嘢係我真正朋友，乜嘢係錦上添花嘅朋友，十年裏我朋友識夠啦，未來要去珍惜喺我跌低時仍陪伴支持我嘅朋友。就算你同我做過一日朋友，我都會好多謝你，好托賴、好多謝喺我低潮時，仍支持我嘅杜汶澤同鍾舒漫等等。我珍惜o依家，無論我幾差、幾惡劣，佢哋都會話江若琳係我最好嘅朋友，呢啲人我呢一世都會記住。」
問到江若琳幻想十年後人生畫面？佢話：「十年後，我都40歲。如無意外應該有幾個小朋友，有個好幸福家庭，唔好再約我食生煎包，我食咗十年。」江若琳諗定要做多仔婆，佢想生四個：「我家有細佬，細個希望萬千寵愛，大個咗發現有兄弟姊妹好開心，有乜嘢事都多個伴，我返唔到屋企陪媽咪，可以叫細佬返去食飯。所以，我幻想將來生四個仔，四個都咁高，幾有型，行出去帶住五個保鑣幾威風。」
(蘋果日報)
