今日9月1日喇，悠長嘅暑假終於結束，莘莘學子正式開學日，無論係學生抑或家長，都齊齊早起身迎接新學年，好似兩位靚媽郭可盈同徐菁遙(Suki，前名徐淑敏)，佢哋嘅囡囡都係就讀位於九龍赫德傑道保良局蔡繼有學校，今朝8時許，郭可盈就帶同女兒林天若上學，可盈同囡囡喺學校較遠嘅地方先行落車，然後就工人姐姐一齊步行返學校。
可盈同可若好sweet咁手拖手咁行返學校，入到學校，可盈仲幫囡囡整理好頭髮，當然要叮囑囡囡幾句，相信都係一啲鼓勵說話同叫囡囡俾心機上堂嘅說話啦，之後就同工人姐姐離開，可盈見到記者，都好友善咁停低傾咗幾句，佢話：「今朝係早啲起身準備，整早餐都係要嘅，老公喺大陸拍緊戲，今日準備咗個好好嘅心情，個女好都期待返學，好開心、好興奮。」呢位廿四孝媽咪都認真唔話得，佢仲話，將會每日會湊囡囡返學同放學。
而另一位靚媽Suki約8點半，坐住「BATMAN V」 車牌嘅七人車，載住兩個寶貝女心瑤同心悠去到學校門外，同行嘅仲有兩個外藉保鑣隨行，兩個寶貝囡囡落車，隨行嘅保鑣隨即緊貼左右，而學校亦好體貼，有多名老師於校外站崗，迎接返學嘅同學。而原先就讀該校嘅郭晉安兒子令山，據知已轉到宣道學校就讀。
(蘋果日報)
