賭王何鴻燊三房「最索千金」何超蓮，昨日被周刊爆出同楊受成細仔楊政龍(Alex)傳出戀情。。。
賭王何鴻燊三房「最索千金」何超蓮，今日畀周刊指佢同楊受成細仔、即係佢契哥楊政龍(Alex)傳出戀情，講到早幾日仲一齊去數碼港拍拖睇首映，仲搵嚟一對男女朋友做煙幕，睇完戲就由楊政龍開車接走，做柴可夫送超蓮返布力徑大宅。
超蓮今午先回覆周刊稱：「其實，我可以公開地答，我同Alex最大關係，我哋連埋其他影到嘅朋友，係Smile with us HK創辦人，所以我哋經常見面，因為成日傾義工嘅嘢，嗰晚另外兩位創辦人都喺度，不過佢哋又話係煙幕，佢哋成日話點解影佢哋當冇到，就cut晒佢哋。所以大家係志同道合，希望可以令到香港年輕人一齊出嚟關心社會，做義工，將開心同微笑，帶畀社會上有需要嘅人。」
兩位當事人今晚同場喺會展，出席香港青年聯會第二十五屆會慶及會董會就職典禮，同場仲有霍啟剛，超蓮重提緋聞就話：「當然唔係(拍拖)啦，佢(楊政龍)係我阿哥。」提到佢同楊政龍識咗幾耐，超蓮就話同對方係family friend：「唔知識咗幾耐，總知我哋大家理念係幫到年輕人，之前幫咗個單親媽媽搬屋，未宣傳都籌到四分一經費，會探訪，邊個得閒就參加，佢都會去。」記者笑佢二人理念相襯，佢就甜笑：「其實，成個會都襯，朋友之間有共同理念先form到。」
講到楊政龍若然追求會唔會應承，佢笑言：「講慈善，唔係講追求，大家都關心我有無拍拖，關心吓社會，自己趁呢個年紀畀多啲心機，幫到社會，同幫媽咪手最重要，拍拖暫時唔會諗。」問到佢揀男友，對方係咪都要做多慈善，超蓮話：「要有共同理念，當然可以，未遇到未來男友。」超蓮再讚楊政龍係好哥哥，問到佢知唔知對方有冇女友，佢就話冇問：「我哋真係好忙，之前有個活動，我差啲暈到，又忙緊會計考試，大家都唔使擔心我緋聞。」
(蘋果日報)
