葉翠翠喺今年4月為老公周曉東誕下7磅半「小王子」，雖然多咗個人仔要照顧，但係離開咗大台嘅佢，除咗忙於照顧囝囝外，仲有花時間同啲網民互動，成功轉型做咗KOL，喺facebook等社交平台儲咗大班fans。
其實翠翠介紹俾網友嘅嘢又真係好廣泛，由美容護膚，到營養進補、BB用品乜都有，難怪咁受網友歡迎，就連廣告客都睇仲佢，喺囝囝出世後短短4個幾月，已經密密接咗4個廣告；而極速收身嘅翠翠，o依家嘅身形比生之前仲fit！早前翠翠喺社交網貼咗一張自拍照，露出小蠻腰，嘩！真係好令人葡萄囉！
翠翠接受訪問時話：「o依家比生之前輕咗磅，做嘢係令自己有推動力減肥嘅，同埋最緊要減得健康，因為一定要有精神照顧BB。」翠翠又笑指囝囝好旺佢，出世後佢廣告接不停，佢笑住話：「開心有咁多客戶支持，不過o依家冇返電視台，成日可以對住BB係好開心，平時都係自己親自照顧，唔會太依賴工人姐姐，有時要出街兩、三個鐘，都會好掛住個仔。」
另外，翠翠最近同老公、囝囝去影樓影咗輯相，佢話呢輯相喺囝囝未出世已經plan好咗影：「影大肚相嗰時，已經知道可以影before and after，即係用番同一個境，但BB已經出咗世喇！」翠翠又話今次其實係同埋老爺奶奶一齊去影家庭照，佢仲爆話影相嗰日囝囝唔夠乖，不停咁喊，影咗幾個鐘搞到一頭煙。翠翠笑言：「一放低佢就喊，要抱住先唔喊，到後來o氹到佢唔喊，點知飲完奶佢瞓咗覺，所以好多相都係影到佢合埋眼。」
(蘋果日報)
