67歲嘅黃玉郎貴為香港漫畫界嘅教父級人物，最近仲同大陸企業合作喺大陸開主題樂園，喺出版行業不景氣之下，仲可以開主題樂園，絕對係事業嘅第二春。
事業得意，黃玉郎愛情仲得意，早前佢仲同細佢三十幾年嘅女友Cass求婚成功。講番歷史，黃玉郎同黎姿傳過緋聞，曾經有過兩段婚姻，不過兩段婚姻都唔夠十年就結束，而喺2012年黃玉郎被雜誌影到同藝人林熹瞳撐枱腳兼十指緊扣，散步拍拖，不過二人多年嚟都否認緋聞，而近年林熹瞳擔任環球傳奇影視娛樂創作及策劃總監，而公司黃玉郎亦有份投資。
喺今年3月仲有傳黃玉郎將第三度結婚，而對象就係生意拍檔林熹瞳，事後兩位當事人就否認結婚，直到7月突然爆出黃玉郎喺女友Cass生日會上求婚成功。
原本喜事一樁，但近日黃玉郎嘅未婚妻，卻與黃玉郎嘅前度緋聞女友林熹瞳(Rachel)喺ig對罵。
Cass懷疑有人入侵佢嘅私人賬號，還鬧爆有人「放料」畀傳媒，仲hashtag「滿口謊言的基督徒」、「林熹瞳」。林熹瞳亦有在對方ig不停留言，解釋影股東相作記錄是工作所需，痛罵對方「試問我點解要為一個無品的小四去改變我的專業？」火藥味濃。
對於兩女罵戰，黃玉郎今日以短訊回覆:「多謝關注，不好意思，私人事不表意見，謝謝！」
而林熹瞳起初都不願多談，但問到Cass係咪對佢有所誤會？Rachel就有啲不憤咁話﹕「佢點諗唔關我事，如果佢唔係公開講到我係滿口謊言嘅基督徒『林熹瞳』，損壞我同公司形象，我作為公眾人物都唔會回應任何嘢。但佢真係一次又一次又次嘅指控，例如佢無端端check我ig，見唔到我就話我入侵佢個ig，唔知做咗啲乜嘢，唉，我真係…講到我好恐怖，其實真係要適可而止，唔止騷擾我一日兩日，係成十幾日，日日咁就覺得…可能覺得我係公眾人物唔會出聲，屈都冇所謂。」
問到佢哋有冇拍過拖？Rachel避談﹕「其實我要講都係佢ig講晒，我要再繼續講就只會係法庭上講，但佢道咗歉(ig)，就息事寧人，我都要畀面黃生。」佢承認因為Cass，佢同黃生避見對方，佢話﹕「其實已經好避忌，私下冇whatsapp，除咗工作group之外。以前間中開完會都會食飯傾偈，現在係零呀！」
（蘋果日報）
