苑瓊丹喺01年透過「相睇」認識老公仲一見鍾情，而喺04年7月，苑瓊丹陪對方去美國出trip，男方突然提出結婚，苑瓊丹把心一橫答應結婚，不過原來。。。
54歲嘅苑瓊丹近年少有喺香港露面，最近期已經係2016年嘅《火線下的江湖大佬》同2012年嘅《造王者》，其實佢近年返咗大陸搵人仔。講到佢嘅感情生活，04年喺美國下嫁家族做玻璃生意嘅富商黃乃掦，老公大佢10年，喺香港擁有多個商用同店舖物業，身家過億。
不過苑瓊丹真係非常保護老公，少有提及，不過佢喺去年一個大陸節目入面《靜距離》就大爆自己同老公相識經過。佢話喺01年透過「相睇」認識老公仲一見鍾情，而喺04年7月，苑瓊丹陪對方去美國出trip，男方突然提出結婚，苑瓊丹把心一橫答應結婚。苑瓊丹仲自認係一個惡妻，成日鬧老公不突止，兩公婆仲試過一言不合打老公咁話。
其中一次，苑瓊丹嬲得滯隨手拎起個鬧鐘，就掟向老公，搞到老公其中一隻眼傷咗，事後畀老婆打嘅嗰個冇出聲，不過打人嘅苑瓊丹之後仲要嗌離婚，逼對方簽分居文件，當時惡妻難服侍，老公當時惟有就範。不過第二日，黃乃揚就私下上律師樓取消離婚文件。夫妻最終牀頭打交牀尾和，事後苑仔都知自己唔啱，仲感激老公對自己嘅包容同忍讓。至於兩夫妻感情由差轉好嘅轉捩點，就因為當時佢哋同苑瓊丹父母同住，喺父母面前，苑瓊丹脾氣當然要收歛，而每次鬧交都專登走去屋企樓下停車場，而到苑瓊丹媽媽過身後，夫妻關係亦開始有好轉。
(蘋果日報)
