【兩父子餅印咁!】陳小春:最好錄完節目大家就忘記他

    陳小春同埋4歲嘅Jasper去咗錄影大陸親子真人騷節目《爸爸去哪兒》,唔知係咪小春同老婆應采兒一直好保護Jasper,於是乎佢大個啲嘅正面樣曝光之後,即刻惹嚟好多網民嘅關注,仲話Jasper同爹哋成個餅印。

    呢個節目喺網上公佈播映日期將會喺9月7號播映,不過時間就轉咗中午12點,到時就可以睇吓呢個惠州政協點樣同囝囝相處,而小春噚日接受大陸傳媒訪問,講到錄影節目嘅情況,小春話自己喺節目有入廚煮吓飯,不過水準一般般,佢仲笑自己係做「黑暗料理」,如果要食,一係過隔籬屋偷啲俾佢食,一係俾佢飲奶當食飯!

    講到點解做呢個節目,小春就話:「剛開始的確有點不太想曝光,後來看了很多朋友去錄過,慢慢發覺找時間跟小孩過自己的生活感覺不錯,剛好他們邀請,我們就去了,最好錄完節目大家就忘記他,希望他長大一點再給他看。」

    雖然應采兒唔係好放心佢做帶子洪郎,不過小春反而好爽,因為囝囝平時都唔係好睬佢!

    (蘋果日報)

    SHARE