為了做個靚新娘，她透露之前積極減肥及做facial，在四個月內瘦了6kg（13.2磅)，靚靚出嫁﹗
有「翻版謝安琪」之稱、由馬來西亞來港發展的歌手龔柯允（Karen），今日與香港髮型師男友Adam於尖沙咀文化中心簽字結婚，不少圈中好友到場送上祝福，包括關心妍、雨僑與男友羅力威、譚嘉儀、劉威煌、陳明恩夫婦及何弘軒等。Karen與Adam在交換戒指及簽字時，都顯得有點緊張，而在讀誓詞時，Karen更有點眼紅紅，但她很快平復心情，並進行拋花球環節，最後由譚嘉儀搶得花球。
受訪時，Karen坦言事前沒有想過會如此緊張：「我覺得唔使表演，唔使準備太多，只要扮到靚靚同埋讀誓詞，冇咩咁難，結果一見到個結婚主持人，我個心就開始跳，又想去廁所咁，個心好混亂，我連筆都調轉嚟簽，亦都有感動位想喊，但都忍住，因為想keep住今日個妝都靚。」她又爆老公非常緊張：「交換戒指時都驚會左右不分，所以我都有提佢左手係邊隻。」為了做個靚新娘，Karen透露之前有積極減肥及做facial，她在四個月內瘦了6kg（13.2磅)：「有減澱粉質，同埋晚晚做sit up同跑步，用天然方式去減肥，好有動力，覺得今日要最好狀態，自己出碟都冇咁大動力，會hea住，結婚就會出盡力，依家都好滿意！」
問到何時會補辦婚禮或擺酒？Karen坦言未定，希望明年可在港擺酒：「到時可以正式請返馬來西亞屋企人同親戚嚟，不過馬來西亞嗰度就已經定咗，5月19號會喺我家鄉納閩島擺酒。」至於婚紗相，她指希望在香港拍攝：「我係外國人，我好鍾意香港，所以一定要喺度影，老公係香港人，我覺得個文化差異好得意，希望將香港嘅文化留喺相入面。」提到與老公生活上的文化差異，她笑謂：「例如食飯會擺啲水喺度，佢會攞嚟洗餐具，我會攞嚟飲。同埋我笑得好大聲，我喺佢公司一笑，佢成間公司都聽到，拍咗拖好耐佢先同我講番，問我係咪個個歌手都笑得咁大聲。」而Karen坦言會在推出新碟後，才開始計劃可會生B：「我都想繼續唱歌，仲未放棄，老公好支持我，我都支持佢做想做嘅嘢，唔想大家有遺憾。」至於可會去度蜜月？她指仍未決定好地點：「可能去個細旅行先，擺完酒再去個大旅行，其實都係搵個藉口去旅行。」
(東方日報)
