佢話唔介意再做奸角﹗不過…雖說無綫曾先後兩次搵過佢，仲出動埋監製同劇本，誠意十足，但佢都。。。
98年四料港姐向海嵐(Anne)，卸任後隨即俾大台安排拍咗唔少古裝劇，其中《楊貴妃》同《無頭東宮》最深入民心。不過08年，向海嵐忽然宣佈息影，轉到上海做公關，直到前年，佢就簽約汪子琦間公司，大陸、香港兩邊走。
今年10月就43歲嘅Anne，最近留港參演音樂劇《我和青天有個秘密》，周一(21日)下晝，有周刊喺銅鑼灣見佢同一女性友人，入咗一間餐廳食晏。席間見佢滔滔不絕發表偉論，女友人只係點頭和應，佢哋食咗約1個鐘就埋單走人。食飽打算鬆一鬆嘅Anne，就同友人到附近上樓舖揼骨，按摩，約兩個鐘後，Anne再現身，唔知係咪成身鬆晒，落樓嗰陣仲笑晒咁行去附近搭的士走人。
離開大台9年嘅Anne，當年講到明因為公司冇幫佢發展，與其留喺娘家繼續等運到，不如出去搏一搏，不過有指大台近年出色女奸角唔多，之前喺《無頭東宮》同《胭脂水粉》做奸角，搞到觀眾咬牙切齒嘅向海嵐，自然成為大台挖角目標。
對於回巢返無綫，Anne接受訪問時，就承認無綫曾先後兩次搵過佢，仲出動埋監製同劇本，誠意十足。Anne表示：「其實最緊要時間夾到，最近呢次，就係因為我要演舞台劇，所以先推咗佢哋。之喺香港留4個月，到年底又要返國內拍劇，都希望下次有機會。」問Anne無綫係咪搵佢做奸角，Anne就話：「應該咁講，我唔介意做奸角，奸角發揮大啲，成功感亦大啲。況且o依家啲人好明智，就算憎都係憎個角色，唔係憎個藝人。」
