狄龍兒子譚俊彥傍晚再做爸爸，添丁湊夠一個「好」字，譚俊彥已有一個兩歲多女兒譚晴，其內地女星太太任祉妍原定月尾才分娩，但突然作動，比預產期早了一星期，譚俊彥即時聯絡醫生，安排太太入院開刀生B，而之前女兒出世時，其父狄龍遲了到醫院，故今次再做「爺爺」的他不想遲，搶先到醫院看孫仔。
譚俊彥接受訪問時坦言因為之前有經驗，故今次不太緊張，他坦言有入產房「陪生」，但就沒有剪臍帶，因為醫生不批准。他謂：「呢排開工都好忙，拍緊《特技人》，冇乜時間瞓，每日只瞓幾個鐘，試過揸車返公司喺公司門口瞓着咗，套劇都要拍到十月，今晚都要開工，但唔緊要，預咗時間會照顧太太同幫手餵奶。」問到再做父親心情如何？他笑言心情好反覆：「成日着住戲服，做戲多過做自己，有啲亂！」
女兒叫「譚晴」，今次他為兒子改名為「譚杺」，因為自己鍾意兩個字的名字，又笑言：「譚晴、譚杺（談情談心），好玩嘢呀！」問到會否再生小朋友時，他坦言將來有個「老三」都好，但要等小朋友大個一點先，又謂：「等我拍多幾個劇賺多啲錢先。（點獎勵老婆？）未諗呀！我啲錢喺晒佢度，佢鍾意點就點。」
之後他又透露爸爸狄龍好開心，問狄龍鍾意孫仔定孫女時？譚俊彥坦言：「都冇乜特別，佢都好錫孫女，不過佢係一個好傳統嘅男人，大家都明啦！大家諗啦！」
(on.cc東網)
