噚日颱風「天鴿」襲港，各區錄得嚴重水浸，大樹倒塌報告。強風肆虐下，莫講話身處戶外有危險，即使留喺屋企都唔安全。
不過偏偏有人大無畏，喺風雨飄搖嘅時刻，冒住強風大雨，幫手清理路面，移走塌樹，呢個人，就係發哥周潤發。
下晝約兩點，有網民喺IG中，就貼上合照，話自己喺十號風球下，喺窩打老道巧遇發哥喺街上幫手鋸樹，網民仲叫發哥小心啲。
相中所見，家住窩打老道附近嘅發哥，戴住黑色帽，着住黑色風褸。
今次同網民影相，就罕有冇拎電話，反而係由網民拎住電話Selfie。
網民事後隨即delete合照，發哥事後回應指自己當時坐車返緊屋企途中。
發哥表示：「見到條馬路有冧樹，所以咪落車幫手執走樹枝，等大家可以行到。」發哥指自己剛從加拿大拍完電影《無雙》，現時正留港休息。
（Apple Daily）
