剛剛先做咗爸爸冇耐，但突然被爆，兩夫妻有啲拗撬，就算喺朋友面前都面左左咁樣，傳佢哋兩公婆感情出現問題。。。
「MK Pop始祖」E-Kids近年鹹魚翻生，相隔14年再推出嘅新歌《一二三四》，雖然被網友批「睇到頭暈又作嘔」，但勝在夠爭議性，成功爭到人氣。有讀者拍得近期有啲「人氣」嘅成員阮民安（Tommy）孭住個幾個月大嘅囝囝現身機楊，見佢慢條斯理推住個行李篋行去機場商務櫃位辦理手續，未見太太Eva在場，不過佢個囝囝好乖，全程未有哭叫，乖到成個公仔咁樣。讀者又爆料話Tommy見事業有機會彈起，日日全情投入工作，成日唔返屋企，搞到佢老婆Eva嬲嬲豬，兩夫妻有啲拗撬，就算喺朋友面前都面左左咁樣，傳佢哋兩公婆感情出現問題。
「我同太太係分開嘅」
現身在日本拍新歌MV嘅Tommy接受東網訪問時就好直接話：「我同太太係分開嘅，喺工作上。」但否認婚姻出現問題，強調一家人都好幸福。至於點解唔見Eva一齊去日本？佢就話：「佢入咗閘先啫，呢啲傳聞都唔知喺邊度傳嚟，阿狗阿貓講啲嘢唔使理啦。（Eva去陪你開工？）唔係，佢係要去大阪做一個DJ騷，我哋都會客串吓，詳情要賣關子。（叫Eva客串新歌MV？）唔會啦。」而Eva嘅IG就甫咗一張孭住囝囝喺機場嘅相，Tommy呢次真係冇講大話。
咁點解又唔見其他兩位成員Alan及Kasa？Tommy就話：「佢哋同排舞老師去咗啦。（去咗？）去咗日本先，佢哋搭凌晨機，因為我帶住個小朋友要坐商務（客位）好啲，小朋友好似話唔夠兩歲，畀小小錢就可以搭飛機，可以平平哋去旅行。」
全日本班底製作表誠意
Tommy又指新歌《咪諗》花六位數字拍攝，起用全日本班底，又說：「托賴，我喺日本咁多年都識到好多日本朋友，無論生意、音樂及藝術上嘅朋友，我話拍MV咋，佢哋就一呼百應。」而專程到日本拍MV是想給歌迷驚喜及表達誠意：「想做畀啲歌迷知，我哋係有用心製作嘅，E-Kids過去十幾年都冇乜嘢撈，依家有機會，梗係想做好啲，追番以前啲時間啦。」
(東方日報)
