53歲吳啟華主力喺大陸工作，出騷、拍劇、仲投資搞甜品店，瓣數多，今日有周刊指，吳啟華為咗養家，就算喺大陸嘅甜品店開到第10間，佢仍然好慳家，由月租十幾萬住畢架山豪宅，搬咗月租平一半嘅太子道西一幢「凶樓」，幢樓曾經有住戶跳樓，原來佢開支都幾大，要養前妻一家，又要照顧阿女吳熙兒嘅生活費。
吳啟華喺2007年同細佢21年嘅大陸女石洋子結婚，不過婚姻只維持7年，有傳太太石洋子係「大花筒」，不過吳啟華都冇介意，覺得女人買靚嘢好平常，吳啟華又覺得自己冇將婚姻處理好，所以佢俾前妻每月6萬作贍養費，據知囡囡熙兒係交由前外母照顧，吳啟華除咗要養囡囡之外，仲會俾前外母一啲家用，舉家去旅行又係吳啟華俾，佢呻過去日本使咗幾十萬，最後一日仲碌爆卡，據知佢都係想囡囡有家庭溫暖，先一齊去旅行，又話吳啟華o依家多數接拍網絡電影，一來開工時間短，有多啲時間見個女。
(蘋果日報)
