陳柏宇憑個人實力喺樂壇唱足11年，今日喺九龍灣開記者會宣佈一擊即中，即將於12月2日舉行紅館處男個唱，記者會佈置彷如畢業禮。佢喺演唱會海報上，胸前仲扣滿唔同獎項嘅嘉許勳章，當中佢最喜歡一個係「陳廣偉」，因為呢個係佢嘅真名：「係一個代表，陳柏宇等於陳廣偉，就如Bruce Wayne代表蝙蝠俠。」
陳柏宇上個月結婚，今個月就宣佈開紅館演唱會，老婆腳頭好，係咪結婚旺事業運？佢話：「唔知，今朝喺屋企樓下踩屎，去到髮型屋有屎味。其實係咪金？好意頭？但我洗晒。」首次開4面台騷，陳柏宇唔識緊張，自言到時先知心情。好多歌手入紙多次先成功申請，陳柏宇說：「唔知喎，唔係我入紙，但好似一次就得。」至於會否加場，佢就話到時要睇門票反應，但期數最盡只能開兩場。
(蘋果日報)
