好似Sammi同安仔咁，1991年開始拍拖，2004年宣佈分手，2011年都係撐枱腳食豬髀，其後公告復合，前年Sammi做埋許太。。。
台灣天后蔡依林（Jolin）同錦榮（Vivian Dawson）拍拖以來如膠似漆，不過上年11月忽然傳出分訊，6年情告終，錦榮回復單身後，桃花朵朵開，先後被影到同By2姊姊Miko同辣模Akemi約會，而Jolin就寄情工作，以為「VJ戀」成為過去式。
點知今日台灣《蘋果》爆上周六（19號）晚上約7點幾，喺台北仁愛路一間餐廳，見Jolin密會錦榮撐枱腳，佢哋有講有笑，分手9個月，似乎有機會愛火重燃。素顏嘅Jolin當日戴紅cap帽、綁馬尾，未知係唔係怕被人認到，稍微拉低cap帽遮住容貌，兩人有講有笑，又互睇手機，尤如一般情侶，錦榮更向Jolin施冧功，未知講咗啲咩，逗得Jolin幾次放聲大笑，搞到隔籬枱都忍唔住望吓。
據報道指讀者最先係認出身高189公分嘅錦榮，再望過去就見同枱坐嘅就係Jolin，身型相當嬌小，讀者與友人約9點離開餐廳，不過Jolin同錦榮仍繼續傾偈，開心傾足2粒鐘，意猶未盡。對於「VJ戀」疑復合，陪住錦榮喺東南亞工作嘅經理人就回應：「錦榮和Jolin2人還是朋友，出去吃飯很正常。」 不過錦榮之前2個月喺台灣做科技節目主持人，上周六工作結束，即去見Jolin，翌日（20號）又飛去東南亞展開為期半月嘅工作，錦榮喺有限嘅私人時間當中，仍排除萬難同Jolin單獨約會，可想而知錦榮對Jolin有多重視。Jolin經理人就回覆：「他們一直是朋友。」
好似Sammi同安仔咁，1991年開始拍拖，2004年宣佈分手，2011年都係撐枱腳食豬髀，其後公告復合，前年Sammi做埋許太。所以呢……Jolin同錦榮分開後……會唔會覺得始終都係對方最好呀!?
