陳茵媺為陳豪三年抱三，先後生下兩子一女，近兩年冇拍嘢，一直專心相夫教子，早前仲一拖三同小朋友去多倫多旅行，唔少人都讚茵媺好犀利，可以一個人照顧咁多位小朋友。
不過，茵媺向來熱愛演戲，近日終於復工，接拍導演劉偉恒新片電影《日月星》。今日「旦哥」鄭丹瑞喺微博放咗張同茵媺嘅合照，原來旦哥係茵媺嘅偶像，旦哥話﹕「陳豪注意！你老婆吩咐你親手沖杯靚咖啡俾佢個偶像，即係我，飲。」
兩人豎起手指公，戲中茵媺飾演英文老師，要着住詩文套裝，但由於天氣太熱，唔使埋位時，茵媺都除低外套，不經意騷出玲瓏身材。
今年6月，茵媺被本報影到去尖沙咀購物，當時身型仲係肥肥地，有指因為要餵人奶畀囡囡，所以一直冇刻意減肥，估唔到茵媺一話開工，就可以咁快修身，相信老公一樣咁勤力操fit，抵讚！
(蘋果日報)
