37歲藝人林盛斌（Bob）又再做老竇喇，之前生咗3個囡囡，今次第四度做老竇，今胎仲要係仔仔，真係恭喜晒！啱啱佢喺IG報喜，佢晒咗仔仔嘅影片，留言話：「各位哥哥姐姐，你哋好！我靚唔靚仔呀？」啲網友紛紛留言，話仔仔好似阿Bob咁話喎！Bob仔睇落都好大隻，喊起上嚟好夠大聲、夠氣，真係似足個老竇。
B仔重七磅幾
Bob接受訪問，佢匆匆忙忙又勁興奮，Bob話太太喺伊利沙伯醫院產子，由於之前三個位女都係喺呢度順利出世，所以都選擇番喺呢度生。Bob話BB太大隻，所以醫生話過幾日會難生啲，搞到今日要安排催生，佢仲話BB 7磅幾重。Bob仲話要特別多謝一班醫護人員嘅幫手添！
讚B仔夠大兜
Bob同大家分享喜悅：「過程好順利，太太痛咗個幾鐘，成個生產過程幾個鐘搞掂，我都有入產房剪臍帶，見到太太好辛苦，我都激動到喊咗出嚟！」依家Bob相當忙碌，又要照顧太太、三位千金，又要安排親友探BB，佢又指三位千金知道細佬出咗世都好興奮，係咁問幾時可以見細佬，Bob只好拍片、影相畀三位姐姐同細佬打個招呼先！問BB大唔大兜時，Bob笑謂：「好大兜！好有衝勁、好有力量，勁過爸爸。」問到B仔改名未，佢就話：「依家好忙呀，未改！」
