唔少做咗媽媽嘅女藝人，都好鍾意用社交網站玩直播同大家分享生活，呢次就輪到兩子之母嘅周家蔚喇，今次佢就直播教大家化妝！
一開波周家蔚就唔怕素顏見大家，望落去冇化妝嘅佢，皮膚零毛孔，真係令人好羨慕呀！
直播開頭仲見到周家蔚老公洪天明突然喺後面入鏡，雖然就未有見樣，不過佢都問吓老婆搞緊乜，見到周家蔚好溫柔咁話自己開緊Live，真係睇見都覺得好恩愛！
成個直播都見家蔚好溫柔咁邊化妝邊同大家傾吓偈，唔少網友都話其實周家蔚妝前妝後都唔係太有分別。
上妝嘅佢只不過係有顏色同精神，完全都唔係妝前妝後兩個樣！
之後又到細仔JT亂入，又喺度問媽媽做緊乜，仲攞住個化妝掃扮化胭脂，非常搞笑！唔少網友都讚周家蔚個妝夠自然，仲叫佢開多啲Live同大家互動吓，大讚佢真係好親民呀！
（on.cc 東網）
