大家都知45歲嘅袁文傑同兒童節目主持出身、現年40歲嘅女友張潔蓮（Jackeline）拍拖6年。。。
袁文傑91年無綫藝員訓練班畢業，之後卻選擇加入A記，決定做亞視出身，一做15年，袁文傑去年重返大台，冇「無綫親生仔」之名加持，但就能夠憑《不懂撒嬌的女人》中「游生」一角彈起，《蘋果》今次就搵嚟「游生」袁文傑，剖白佢嘅內心世界。 
最近袁文傑應邀成為信貸公司代言人，係入行27年嚟嘅第一次，袁文傑話：「當然非常開心！終於做到嘞！廣告我拍唔少，代言就第一次，呢個係大品牌，拍攝好開心，今次拍攝有特技，幾有難度，又識到新朋友。」
講到酬勞係咪好高？袁文傑笑笑口話：「當然非常滿意，都有6位數字。」自從「游生」一角彈出，o依家仲做埋代言人，事業得意感情又點呢？
大家都知45歲嘅袁文傑同兒童節目主持出身、現年40歲嘅女友張潔蓮（Jackeline）拍拖6年，係公認嘅一對，常被讚係暖男嘅袁文傑，原來已經計劃好，兩年內娶Jackeline，佢話：「我都係做返男友本份，暖唔暖男都冇相干，大家年紀都唔細，希望兩年之內啦！」
而袁文傑亦一直視對方係結婚對象，佢大讚Jackeline話：「佢係一個好好嘅女仔，我未遇過呢種性格嘅女仔，佢好單純，相處得好舒服，唔使顧忌太多，到我呢個年齡嘅人嚟講，但求大家相處舒舒服服，唔需要波瀾壯闊、驚天動地，過晒嘞！呢刻彼此相處係最好時機。」
講到夢想婚禮，袁文傑就話：「個人崇尚自由、低調、隨意啲，話聲畀啲老友聽就算。但我曾經公開講過會搵陳啟泰、張文慈同蔡國威做婚禮嘅司儀，之前同啟泰食飯佢追問我幾時？叫我唔好甩底！佢嚴厲地逼迫我，我不能低調處理，難得泰哥咁認真對待。」但講到生兒育女，袁文傑就話：「湊小朋友好大責任，屋企已經有囝囝要用心照顧，我係講隻貓，生B冇諗過喎。」
